काठमाडौं, असार १९ - नौ बर्षको अन्तरालपछि आएको आफ्नो दोस्रो एल्बम ‘समय संगीत’को प्रतिक्रिया राम्रो आएपछि गायिका रिमा गुरुङ्ग होडा निकै उत्साहित बनेकी छिन् ।
यतिखेर उनी एल्बम ‘समय संगीत’मा रहेको गीत ‘चिसो चिसो’ को म्युजिक भिडियो रिलिज गर्ने तयारीमा छिन् । यसभन्दा अगाडी एल्बमको ‘तिमी हाँसे पो’ गीतको म्युजिक भिडियो सार्वजनिक भएको थियो । एल्बम ‘समय संगीत’ बजारमा आएको दुई महिना भएको छ । अहिले गीत हिट हुन म्युजिक भिडियो अनिवार्य झै भई सकेको छ । पहिले उनै गायिका रिमा गुरुङ्ग होडाको गीत ‘लाहुरे दाईले परदेशबाट’, ‘मरि देऊ भन बरु’ लगायतका गीत विना म्युजिक भिडियो पनि एकदमै हिट भएका थिए । तर अहिलेको परिस्थितिलाई मुल्यांकन गर्दै उनी भन्छिन “स्रोताले मेरा गीतहरु खोजी खोजी सुन्नुहुन्छ जुन कुराले मलाई अझ थप नयाँ नयाँ गीतहरु गाउन उत्प्रेरित गर्छ । तर पनि पछिल्लो समयमा म्युजिक भिडियो पनि अनिवार्य झै भई सकेको छ ।”
एल्बम समय संगीतमा ९ वटा गीतहरु रहेका छन् । एल्बममा भुपेन्द्र खड्का, बसु शाही, श्रवण मुकारुङ्ग, उदय सोताङ्ग, गगन गुरुङ्ग ,रमेश कोइराला, खेमराज गुरुङ्ग, ललिता कुवर को शब्दरचना र सचिन सिंह, गणेश रसिक, प्रकास गुरुङ्ग, उदय सोताङ्ग, गगन गुरुङ्ग, रत्नबहादुर खड्गी, खेमराज गुरुङ्गको संगीत रहेको छ । एल्बमलाई सन्तना रेकर्डस्ले बजारमा ल्याएको हो । “मिडियाबाट र स्रोताबाट गीतको प्रतिक्रिया राम्रो आएको छ तर कमर्सियल्ली चाही त्यती राम्रो भई रहेको छैन । हुन त अहिलेको बजारले पनि होला” रिमा भन्छिन् ।
पहिलो म्युजिक भिडियोको प्रतिक्रियाबाट आफु सन्तुष्ट रहेको उनी बताउँछिन र अबको भिडियो पनि दर्शकले रुचाउनेमा उनी ढुक्क छिन् । १६ बर्षको उमेरबाट नै गायनको यात्रा अगाडी बढाएकी रिमाले विभिन्न कलेक्सन एल्बमहरु र फिल्ममा गरेर लगभग ५ सयभन्दा बढी गीतमा स्वर दिई सकेकी छिन् ।
रिमा चर्चित संगीतकार प्रकास गुरुङ्गकी छोरी हुन् । रिमाको पहिलो एल्बम ‘पहिनिर’ हो । जुन ९ वर्ष पहिले बजारमा आएको थियो । दोस्रो एल्बम आउन त ९ वर्ष नै लाग्यो नि ? जवाफमा उनी भन्छिन् “राम्रा राम्रा गीतको छनौट गर्दा गर्दै ९ बर्ष लागेको हो । प्रत्येक बर्ष एक एक वटा गीत छनौट गरि एल्बम तयार पारेकी हुँ ।”
श्रोत उज्यालो
Post a Comment